- 768 -

1453. März 20. Breslau.

Petrus von gots gnadin bischoff zcu Breslaw.

Vnsir gunstlichin gruss vnd allis gut zcuuor. Erbarn, weisen, besundern gute gonner. Wir habin awir schrifftliche warnunge, die ir vns itczunt leczt mit hulfflichen irbitungen zcu gesand habit, eigintlich verstandin vnd danckin euch sulchs fleissis vnd guts willen fleissiglichin sere vnd habin von stund mit den von Breslaw doraus gehandilt, den ir denne des glichin ouch geschrebin habit &. Abir so vns von Preichaw noch bisz her nicht botschafft einkomen ist, hierumbe zo habin wir gedocht vf czu haldin, bis wir vns sulchir sachin gantcz gruntlichin mochtin irfaren, wie abir dem allin, zo bittin wir euch, ir wollit gut vfsehn vnd eigintliche irfarunge dorynne habin, wenne wir zu allem bestin vnd zu wolgefallin alleczeit bereitwillig sein vnd an vns in den vnd allin sachin der abegangk nicht sein sal, des glich wir vns ouch alhie irfarn wollin vnd worczu wir euch fruntlich sein sollin, das ist vns leichte; wir habin aus gloupwirdiger vndirsagunge eingenomen, wie is den awern, die ir zcu vnserm hern konig Laslaw gesant habit, in awirn vnd awir stad sachen vnde vernemen richtig zu sage vnd bey seinen koniglichin gnadin gancz wol zu stehe, des wir vns vorfrewet habin vnd gancz gerne horen, idach czweiueln wir nicht, desglich sey euch vnuorhaldin &., ap euch was do macht an gelegin were in den vorgemeltin sachin einqweme, das lossit vffenbar werdin, das wollin wir in allim gute verschuldin. Gebin zcu Breslaw den dinstag nest noch Judica anno & quinquagesimo tercio.

Rückaufschrift: Den erbern weizen ratmann zcn Legnicz.

Liegn. Arch. Act. No. 185.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866